UNESCO-in Manas-a samakte an mang a hlau

UNESCO World He­ri­tage Centre chuan As­sam, Manas Wildlife Sanc­tuary-a samak ki khat nei chu sa pel ṭhinte lakah thuneitute'n an hum­halh thei lo a nih chuan kum 30 chhunga an mang theih thu a tarlang.

Manas sanctuary hi UNESCO World Heri­tage Centre chuan World Heri­tage Site-ah a lo puang tawh a ni.

UNESCO chuan sor­kar chu Tiger Conser­va­tion Plan kaltlangin sanc­tuary-a staff tipung turin a ngen a, sa pel ṭhinte laka ramsate hum­halh nan sanctuary-a hna­thawktute pawh bungraw changkang zawka thuam turin a ngen bawk.

UNESCO World He­ri­tage Centre leh Inter­na­tional Union for Conser­vation of Nature (IUCN) chuan Manas Sanctuary chu dinhmun hlauhawma World Heritage Site awm zingah a tel thu an tarlang bawk.

IUCN Conservation Bree­ding Specialist Group te'n kumina Rhino Popu­­lation Viability Ana­lysis an neihah Manas Sanc­tuary-a samak te chu hum­halh ṭhat an nih loh chuan an mang theih thu a tarlang.

IUCN group chuan June 28 aṭanga July 8 thlenga Germany, Bonn-a UNESCO World Heritage Committee-in session vawi 39-na a neih hunah a zirchianna report chu a kimchanga tlangzarh a tum thu a tarlang bawk.

Manas Wildlife Sanc­tuary hi kum 2011 khan 'List of World Heritage in Danger' aṭangin paih a ni a, mahse dinhmun himah erawh a awm loh thu a tarlang.

UNESCO World Heri­tage Centre report chuan Manas Sanctuary-a sa­khi chi khat, Swamp Deer te chu chi mang mai hlauhthawnawma an awm thu leh IUCN Red List-a a awm thu a tarlang bawk.