Hel pawlte fund danchahsak dawn

Myanmar sorkarin an ramchhunga hmarchhak hel tawmhimna zawnga inkulhte dapchhuahna beih­pui thlak a tum rualin sorkar laipui chuan helte sum hnar danchahsak a tum.

Hmarchhaka hel pawl tam zawk hi Myanmar rama inkulh an ni a, Myan­mar sorkar chuan an lakah vawi eng emaw zat beihpui thlak a tum thu a sawi hnuin a hmalakna erawh a la awm lo thung.

Security agency offi­cial pakhat chuan hel pawlte sum hnar chu police leh security force te'n an tihchahsak thei a nih chuan helte chu engmah tithei loa an siam theih a beisei thu a sawi. Mipuite hnena tukluih chhiah an khawnte an dawn ṭhat loh avangin National Democratic Front of Boro­land (S) hel leh United Libera­tion Front of Asom (Inde­pendent) helte chuan har­satna an tawk ṭan tawh niin official chuan a sawi bawk.

Nikum December 23-a NDFB (S) helte'n Assam hmar lama district-a mi 70 chuang an thah vanga security force te'n an laka beihpui an thlak hnuah helte hi an chan a chhe tawh hle tiin security official chuan a sawi a, helte sum hnar ber chu mi rukbo leh tukluih chhiah khawn a nih thu leh thla li kalta chhung khan rukbo leh tukluih chhiah khawn an neih loh thu a sawi.

Hmarchhak hel pawlte dangte chuan SS Khap­lang-a kaihhruai, NSCN (K) te zar an zo mek tih sawiin, Khap­lang-a pawlte hian sorkar nen inkahhai thuthlung an neih chhung khan a rukin hel pawl dangte a lo thawhpui tawh ṭhin a ni, a ti.