Assam-in Jan 1-ah Elementary school hawng dawn

Assam education minister Himanta Biswa Sarma chuan kum 2021, January 1-ah state chhunga elementary school-te chu hawn an ni dawn tih a puang. 

Prathamik Sikshak Sanmilani (Primary teachers association) nena ṭum eng emaw zat an sawiho hnuah KG-Class 6 hawn hun tur hi rel fel a nih thu minister chuan a sawi. Hemi atana kaihhruaina siamte chu tihchhuah thuai a ni ang, a ti. 

Minister chuan college hostel-te pawh December 15 aṭangin hawn ṭan ani dawn tih a puang bawk a, final year zirlaite chu hostel-ah hian an awm phalsak an ni ang. College principal leh thuneitute hnenah, hostel te hi damdawi hmanga kap thianghlim vek tura hrilh an ni. 

Residential school-te pawh an hostel hawn phalsak an ni dawn bawk a, mahse hostel-ah hian Class 10 leh 12 zirlaite chauh awm phalsak rih an ni ang. Engineering leh polytechnic college-a online class kalpui chu December 15 aṭangin offline class neih a nih tawh dawn avangin titawp tura tih an ni bawk. 

November thla tir lam aṭang khan state sorkar chuan Class 6 chunglamte chu school kal a lo phalsak tawh a, mahse school-te hi odd-even system zawm tir an ni thung. Thawhṭanni, Nilaini leh Zirtawpniah Class 6,7 leh 9  te kalin, Thawhlehni, Ningani leh Inrinniah Class 8,10 leh 11 te an kal thung. Zirlai naupangte hi nu leh pate remtihpui te chauh kal tir an ni.

Health minister ni bawk, Sarma chuan an state-ah Covid-19 kai hmuh chhuah tawh hi mi 2,12,617 an awm tawh tih sawiin, an zinga 2,08,283 chu enkawl dam an ni tawh, a ti. State chhungah hri leng chu an thunun theih tawh tih sawiin, hri lengin ziaawm lam a pan chhoh avangin Covid Care Centre lailawk atana siamte pawh khar an ni tawh a ni, a ti. Covid-19 veite chu hospital-ah zel enkawl an ni tawh ang.