Tuilian tuarten sorkar hmalakna duhkhawp lo

Meghalaya-a West Garo Hills leh a chhehvela cheng te chu tuilian avangin an la buai reng a, hetih lai hian chhanchhuah hna thawh kawngah state sorkar a chet muan avangin mipuite an lungawi lo hle.

Himna zawnga mahni in leh lo chhuahsan tam tak te chu relief camp-ah an khawsa mek a, tuilian hian nunphnung a tikhaihlak nasa hle. Ni 13 chhung vel zet chu tuilian hian Garo Hills-a chengte tan harsatna a thlen tawh a, helai bial chengte chuan sorkar hmalakna an duhkhawp loh thu an sawi. Tuilian tuarte chuan kumtin harsatna an tawk a, hei hi state sorkar pawhin a hria a ni, an ti. Mahse tuilian veng tur leh mipuite himna ngaihtuah kawngah sorkar chuan hma ala chak tawk lo tih an sawi. Relief camp-a cheng tam takte chuan an chenna tuiin a len tawh thu leh, haw lehna tur an neih loh thu an sawi.

Relief camp-ah te hian ei tur leh tui intur te pek ni ve bawk mah se an mamawh a phuhru zo lo nia tarlan a ni. Camp-a awm Santi Ravi Das chuan, "Relief camp-ah hian eng thil mah beisei leh tur chuang awmin ka hre lo, relief material eng emaw chu pek ni ve bawk mah ila a bei tham hle a ni, nimahsela kan retheih em avangin beisei leh tur chuang kan nei lo" a ti. A bikin thingtlang khua ten tuilian hi an tuar nasa a, mi tam tak chuan sorkar hmalak dan chu an duh khawp loh thu an sawi. Garo hills-a village headman pakhat chuan, "Sorkar chuan kan harsatna tawh min hriathhiampui tak tak lo a, inkalpawhna kawngpui tam tak tuiin a chim tawh a, kan tawrhna hi a nasa hle a ni. Cyclone a tleh bawk avangin, relief camp leh kawngpui sir vela khawsa te tawrhna hi a rapthlak hle. Nimahsela tumahin kan harsatna tawh hi min hriathhiampui duh lo a ni" a ti.

Activist Mostafa Kabir chuan tun hnai khan tuilian tuartute hi tlawhin an harsatna a hmunah a enpui. Kabir chuan mipuiten an harsana an au chhuahpui chu hriatsak a, an mamawhte pek a, an nunkhaw chhuah theih nana hma la turin sorkar a ngensak tih a sawi.

West Garo Hills deputy commissioner Pravin Bakshi chuan Thawhlehni khan thuthar thehdarhtute kawmin, tuilian avanga harsatna tawkte ngaihsak tawk lo leh chhawmdawlna pe ṭha tawk lo anga tarlan chu thu belhchian dawl lo a ni, a ti. National Disaster Response Force leh State Disaster Response Force aṭanga ṭanpuina sumte chu a nih tur ang taka hman chhuah a ni a ti a, tuilian avanga harsatna thlen dan kimchang chu zirchian a nih thu leh, a ṭul dan anga sum pek chhuah a nih tur thu a sawi. July 22 atang khan ruah nasa tak sur ṭanin, July 27 thleng a sur a, hei vang hian duh angin chhawmdawl lam hna pawha thaw chak theih loh thu Bakshi chuan a tarlang tel bawk.

Bakshi chuan High Powered Committee chu Meghalaya Chief Minister Mukul Sangma kaihhruaina hnuaiah din a ni a ti a, member-ah hian West Garo Hills Deputy Commissioner, SDO Civil Dadenggre leh BDO Selsellte an tel. July 31 aṭang khan Relief Camp hrang hrangah mipui mamawh zualpui sem chhuah a ni a, ni 10 chhungin thingtlang khua 151 zeta tuilian tuartu mi nuai 1.23 vel zet hnenah pek chhuah nia tarlan a ni.