Manipur-ah AFSPA hman reng a la ni : Rijiju

Minister of State for Home Affairs, Kiren Rijiju chuan Manipur-ah Armed Forces (Special Powers) Act (AFSPA) hman reng a la nih thu Lok Sabha-ah Thawhlehni khan a sawi chhuak.

Rijiju chuan Manipur-ah AFSPA hman reng a la nih thu leh, hun bi neia enfiah leh thlithlai reng a nih thu a sawi. Manipur chu disturbed area-ah puan a nih avangin AFSPA hman a ngaih thu a sawi bawk. Hetih lai hian hmarchhaka hel pawl lian tak pakhat National Socialist Council of Nagaland - Isak-Muivah (NSCN-IM) leh sorkar laipui chuan August 3 khan inremna thuthlung an ziah thu a tarlang. Inremna chu a ṭul dan anga ennawna siamrem a nih ṭhin tur thu sawiin, inremna tluantling siam a nih hmain Nagaland, Assam, Meghalaya leh Manipur sorkarte chu dawr an nih tur thu a sawi bawk.