Assam Speaker leh DoNER Minister-ten Tuilian chungchang sawidun

Assam Legislative Assembly speaker Ranjeet Kumar Dass leh Union Minister of State (Independent Charge) for Development of North Eastern Region (DoNER), Dr Jitendra Singh te chuan Assam-in tuilian nasa tak a tawrh mek chungchangah New Delhi-ah meeting an nei.

Assembly speaker chuan Ministry of DoNER hnuaiah an state tan tuilian laka mipuite himna atan hmalakna tur project ngaihtuah sak turin Jitendra Singh hi a ngen. Dr Jitendra Singh chuan Centre and Disaster Management agency special team te chu tuilian tuarte chhawmdawl hna thawk tura tirh an nih tawh thu sawiin, chhawmdawlna leh kum tina harsatna an tawh ṭhin ven a nih theih nana a theih anga hmalakpui a tum thu a lo hrilh a ni. Jitendra Singh chuan two-lane Railway over-bridge, Barpeta district-ah Non-Lapsable Central Pool of Resources (NLCPR) sum hmangin Ministry of DoNER chuan a siam tur thu sawiin, hemi atan hian Detailed Project Report (DPR) pawh thehluh a nih tawh thu a sawi bawk.

Speaker Ranjeet Kumar Dass chuan kumina tuilian an tawrh chu a namai lo hle tih Union Minister chu hrilhin, mihring 30 chuangin nunna an chan tawh bakah samak 20 leh ramsa dang 242 chuang an thi tawh a, ramsa thi mai tur 107 chhanchhuah an ni tawh a ni, a ti.