Assam-a hnam peng 6 te ST status pek tum

BJP kaihhruai NDA sorkar chuan Assam-a hnam peng parukte hnenah Scheduled Tribe (ST) status pek a tum.

United Liberation Front of Assam (ULFA) helte leh sorkar laipuiin remna zawnga inbiakna an neihah hnam peng parukte hnena ST status pek hi helte thil thil phut zingah a tel a ni. ULFA chuan Assam ram zalenna an sual chu hnam peng parukte hnena ST status pek an nih chuan an bansan tur thu an tarlang.

Hnam peng parukte hi - Koch-Raj­bongshis, Moran, Muttock, Sootea, Tai Ahom leh tea tribe te an ni.

Chairman Arabinda Rajkhowa-a kaihhruai ULFA hel pawl chuan Bangladesh aṭanga Assam-a pemlut tam lutuk chu a ngaihmawh thu sawiin, ST status chu pemlutte lak aṭanga anmahni humhalh theihna tur a ni, a ti.

Kum 1980 chhoa All Assam Students’ Union (AASU)-in kum ruk chuang zet Bangladesh mi, pemlutte laka beihpui thlaka nawrh a huaihawt hnuah BJP chu Bangladesh mi pemlutte thawnkirna atana thawkchhuak tam pawl a ni a, hei vang hian NDA sorkarin hnam peng parukte hnena ST status a pe a nih chuan nakkuma Assam assembly inthlanah BJP-in a chet ṭhatpui an rin thu Assam tualchhung chanchinbu ṭhenkhat chuan an ziak.

Kum 2011 chhiarpuiah Assam-ah hian mihring vaibelchhe 3.12 an awm a, heng zing aṭang hian hnam peng parukte leh tribal hnam dang - Bodo, Sonowal-Kachari, Dimasa leh Karbi hnam te hian 50% an awh pha a ni.

Assam-a hnam peng parukte hnena ST status pek tur chungchangah hian Union Home Minister Rajnath Singh chuan Union Tribal Affairs Minister Jual Oram chu ṭum hnih a titipui tawh a ni. Tribal Affairs Ministry chuan ST status pek dan turah thil pawimawhte a buaipui ang a, Union Cabinet ngaihtuah atan a thawn ang. Registrar General of India (RGI), National Commission for Scheduled Tribes (NCST) leh Anthropological Survey of India (ASI) chuan Assam hnam peng parukte hnena ST status pek tur chungchangah hian sorkar laipuiah an ngaihdan an thlen vek tawh bawk.