1971 hnu lama Assam-a pemte tan hmun a awm lo

Registrar General of India (RGI) chuan Assam-a National Register of Citizens (NRC) 1951 update-na kalpui mekah India khua leh tui dik tak March 25, 1971 hnua lama Assam-a pem lutte chu NRC-a telh lo turin state sorkar a hriattir.

Hetihlai hian state sorkar chuan India khua leh tui, March 25, 1971 hnua Assam-a pemte hi electoral roll-ah chuan telh an nih tur thu a tarlang.

RGI chuan he thutlukna hi kum 1985-a Assam Accord an lo ziah tawh zulzuiin a siam a, Assam mi dik tak finfiah nan hian Assam Accord chuan March 25, 1971 chu a lo ruat tawh bawk.

Assam sorkar chuan Assam mi a hmaa Shillong-a chengte pawh NRC ah hian telh an tum thu a tarlang bawk a, mahse Assam state ṭhenhran a nih hmaa Assam mi ngei an ni tih finfiahna document an nei tur a ni, a ti.

NRC update kalpui mekah in tinah NRC form sem mek zel a ni a, form-ah hian 'legacy data code number' fill up tur awmin, NRC Sewa Kendras leh NRC website kaltlanga en theih a ni. Kum 1971 hmaa Assam-a cheng tawh, legacy data code number zawng hmu zo lo an awm chuan form hran siamsak an ni ang. NRC form hi July thlaa thehluh hman vek tura ruahman a ni.

Assam-a NRC update nan hian state pumah NRC Sewa Kendras 2,500 hawn a ni.

NRC 1951 hi kum 1951 chhiarpui behchhana siam a ni a, Assam mi, India khua leh tui hming nuai 64 chuang chhinchhiah a ni.

Assam-a Bangladesh mi pemlutte tam lutuk vanga All Assam Students’ Union-in NRC siamṭhat a phut hnuah kum 2005, May 5 khan zirlai pawl aiawhte bakah state sorkar leh sorkar laipui aiawhte chuan New Delhi-ah meeting an nei a, Supreme Court en­pui­na hnuaiah NRC update an rel a ni.