GNLA-in AAYF a thlawp

All A’chik Youth Fede­ration (AAYF)-in Garo Hills Autonomous Dis­trict Council (GHADC) inthlan huai­hawt thuai tura state sor­kar a phut avanga ngawrh zawka nawrh huaihawt a tum chu Garo National Li­be­ration Army (GNLA) hel pawl chuan a thlawp tih a tarlang.

AAYF hian a thil phut nawr nan Thawhṭanni aṭang khan poster campaign a nei ṭan tawh a, nimin leh vawiin hian non-cooperation move­ment huaihawt tumin, darkar 48 bandh a huai­hawt a tum a ni. May 21 thleng AAYF hian zan lamah kawngpui dan chah a rel bawk.

GNLA joint publicity secretary Garo Mandei Ch Marak chuan thuchhuah a siamah AAYF-in darkar 48 bandh a huaihawt chu lawmawm a tih thu tarlangin, bandh chu Garo mipuite ṭhatna tur a ni, a ti.

"Sorkar laipui chuan GHADC inthlan chu state sorkarin a hamṭhatna atan a tihkhawtlai tih a tichiang tawh a, bandh chu a hlawhtling a nih chuan Chief Minister Mukul Sangma-a'n politics-ah a chhiatpui ngei dawn a ni," tiin Marak chuan a tarlang bawk.

GNLA chuan district thuneitute leh state sor­kar chu Garo mipuite duh dan kalha che lo tura vauin, AAYF thiltih chu an thlawp zel tur thu a tarlang.

Hetihlai hian West Garo Hills Deputy Com­mis­sioner Pravin Bakshi chuan AAYF te'n non-cooperation movement leh zan lama kawngpui an dan chah avangin Cri­minal Procedure Code (CrPC) section 144 tlawhchhanin, khaw laiah mi panga aia tam punkhawm a khap a, state sorkar pawhin AAYF hotute lakah Meghalaya Maintenance of Public Order (Amendment) Act (MMPO) tlawhchhanin thubuai siam a tum bawk.