Silai tung turin Tripura CM-in helte a ngen

Tripura Chief Minis­ter Manik Sarkar chuan helte chu an silai tung a, remna leh muanna hnuaia state hmasawnna atana kawng sial turin a ngen.

"Tripura-a tribal leh non-tribal te chu hman aṭang tawhin inngeih takin an lo cheng ho tawh a, remna leh muanna hi state hmasawnna kawng a ni a, hei vang hian silai pu-a la rammu te chu an silaite dah ṭha a, nun­phung pangngai taka nung turin ka ngen leh duh a ni," a ti.

Tripura Tribal Areas Autonomous District Coun­cil (TTAADC) in­­thlana Left Front-in hnehna an chan lawm­na inkhawm, Khu­mul­wung-a neihah Sar­kar chuan he thu hi a sawi a, TTAADC-a exe­cutive member te chu khaw­tlang hmasawnna atana fund dahte a nihna tur ang taka hmang turin a ngen bawk.

May 3-a TTAADC inthlan­na seat 28-a neih­ah CPI-M kaihhruai Left Front chuan seat zawng zawng a la vek a ni. TTAADC-ah hian hian seat hnih chu nominate seat-a dah a ni.

Meeting-ah hian Radhacharan Debbarma chu TTAADC Chief Exe­cutive Member (CEM)-a lakluh a ni nghal a, chair­man atan Ran­jit Deb­barma lakluh a ni bawk.

CEM Radhacharan chuan TTAADC chu India rama council dangte tana entawntlaka siam a tum thu sawiin, hmarchhak biala district council 16 zingah a ṭha ber an nih tawh thu a sawi bawk.

"Council area-a hma­sawnna thlen kawngah midangte entawntlak nih kan tum a ni. Mahse hmasawnna chu remna leh muanna a awm chauhin a thleng thei a ni," a ti.

TTAADC hi kum 1984 khan India dan­pui,Sixth Schedule tlawh chhana din a ni a, a thil tum chu tribal te polticial, economic leh culture humhalh a ni.