KHADC CEM hluiin court zah lohna thubuai a awrh
Meghalaya High Court chuan Khasi Hills Autonomous District Council (KHADC) Chief Executive Member (CEM) hlui Adelbert Nongrum chu court zahlohna thubuai siamsakin, Thawhṭanni khan man a ni a, Shillong District jail-ah dahluh nghal a ni.
KHADC CEM hlui, Nongrum hian Meghalaya sorkarin Village Administration Bill, 2014 a pawmpui avanga lungawi lohna lantir nan kar kalta Inrinni aṭang khan chaw ngheiin a nuar tawh a, jail-ah pawh chaw nghei chhunzawm zel a tum thu a sawi.
Chief Justice Uma Nath Singh leh Justice TNK Singh te awmna, High Court division bench chuan Adelbert chu puh a nihna laka insawifiah turin a hriattir nghal a, hearing neih hmaa show-cause notice thehlut turin a hriattir bawk.
Meghalaya High Court-in khawtlang/veng hruaitu (Rangbah Shnong) te thuneihna a hlihsak chungchangah Nongrum hian kumin kumtir lam khan court thutlukna a lo sawisel tawh a, hei vang hian court chuan Contempt of Courts Act, section 14 tlawhchhanin thubuai a siamsak a ni.
Court thutlukna a sawiselna, tualchhung chanchinbu hrang hranga a lan danin Nongrum hian Rangbah Shnong te thuneihna hlihsak chungchangah High Court thutlukna chu a damchhunga dodal a tum thu a sawi tiin court thuchhuak chuan a tarlang.