Meghalaya : NEHU zirlaiten thawktu ruat thar an duh lo

Meghalaya-a North-Eastern Hill University (NEHU) buaina chuan ziaawm lam a pan thei lo a, Vice Chancellor-in thawktu a ruat thar chu zirlaiten an duh lo a, VC hi bang hmasa phawt turin an phut.

Vice-Chancellor Prabha Shankar Shukla chuan Pro-Vice Chancellor pahnih, Shillong leh Tura Campus-ah Prof Sherwin May Sungoh leh Prof Fameline K Marak te a ruat a ni.

Mahse Nilaini zan khan North Eastern Hill University Students Union (NEHUSU) chuan thuchhuah siamin, VC thiltih dan chu an duh lo tih an sawi.

Zirlaite hi November 6 aṭang khan chaw ngheiin lungawi lohna an lantir a, an la chhunzawm zel a ni. NEHUSU chuan thil phut pakhat chiah an neih thu sawiin, VC Prabha Shankar Shukla ban a ni an ti. An thil phut hi tihhlawhtlin anih hma chu VC thutlukna siamte chu an ngai pawimawh dawn lo tih an sawi bawk.

Union chuan hetiang appoinment siamtu ber hmuh tur a awm lo a, bibo chunga thutlukna a siam chu an pawm theih loh thu an sawi a, biru chungin engtinge meeting a kaihhruai theih tih pawh an zawt nghal bawk. VC chet dan chu hmun hran aṭanga university thunun tumna a ni, an ti.

Nawrh huaihawt avang hian November 6 aṭang khan zirna lam pawh a khaihlak tawh a, Khasi Students Union leh North-Eastern Hill University Teachers Association chuan NEHUSU hi an thlawp bawk a ni.

Zirlaite chuan appointment notification rawn chhuak chu mak an tih thu sawiin, Joint Registrar (Establishment) ni loa Assistant Registrar (Planning) aṭanga tih chhuah a nih chuan ngaihtuahna a ti thui hle a ni, an ti. An harsatna tawh mekah Chief Minister-in thu lawmawm zawk thlen a tiam laia, hetianga dan pangngai lo taka appointment ruat a ni hi mak an tiin, a lungawi thlak loh hle tih an sawi.