Manipur: Congress-in Governor inrawlh turin phut

Congress Legislature Party, Manipur chuan governor Lakshman Prasad Acharya hnenah memorandum an thehlut a, Jiribam-a hmeichhia pathum leh naupang pathum rukbote chu him taka chhanchhuah an nih thuai theihna tura inrawlh turin an phut.

Jiribam-a tun hnaia buaina chhuak chu an ngaihven thu sawiin, Congress MLA-te chuan thla 18 chhung zet tualchhung buaina thleng tawh chu titawp thuai turin an ngen bawk. Memorandum hi November 13 khan an theh lut a ni.

Eptu pawl chuan Jiribam district-a buaina chhuak thar chuan state chhunga buaina thleng tawh sa a tihpunlun thu an sawi bawk.

Memorandum-ah hian hmeichhia pathum leh naupang pathum ruk bo chu an chhungte an mangang tawh hle tih sawiin, heng ruk bo te hi him taka chhanchhuah an nih theihnan leh mipui a bikin hmun derthawng zual laia awm te venhim kawnga chak zawka hma la turin Governor hi an ngen a ni.

Tualchhung buaina thlengah Manipur-a BJP sorkar chu duh anga hma la tawk lo leh, a mawhphurhna hlen lo tiin an lungawi loh thu Congress MLA-te chuan an sawi. Buaina hrang hrang - tharum thawhna te, bomb hmanga inbeih leh hmun hrang hranga buaina chhuak vanga mahni chenna in chhuahsan leh nunna hial chan an awmte pawh thinrimthlak an tih thu an sawi tel bawk.

Congress member te hian state sorkar leh sorkar laipui chunga an lungawi loh thu sawiin, Prime Minister Office leh Union Home Ministry ten Manipur an ngaihven tawk lo chu a lungawithlakloh hle a ni, an ti. Chief minister N.Biren Singh kaihhruai sorkar chu state chhunga dan leh thupek kenkawh kawngah a chak tawk lo hle a ni, an ti.