Tripura: Scindia-a'n mipuite ngaihthahah Congress a puh

North Eastern Region (DoNER) minister Jyotiraditya Scindia chuan Congress chu Tripura leilung fate ngaihthah leh, an dikna chanvo hup beh sakah a puh.

Scindia chuan he thu hi Agartala-a Rabindra Satabarshiki Bhavan a Janjatiya Gaurav Divas lawmna neihnaah a sawi a ni. "India in zalenna a neih hnuah pawh tualchhung mite chuan dinhmun hlauhawm tak hmachhawnin, hmasawnna leh hamṭhatna an dawng lo a. Congress sorkar lai khan mipuite chu engmah sawi chhuak ngam loin engkim chhuhsak an ni zawk. Mahse kum 2014-ah Narendra Modi a Prime Minister aṭang khan engkim thlak danglamin a awm ta a ni," a ti. Congress lamin Bhagwan Birsa Munda chanchin nuaibo an tum laiin, PM Modi chuan November 15 Janjatiya Gaurav Divas ah a puang ta zawk tih a sawi. PM Modi chuan leilung fa dik takte chu hruaitu pawimawh tak takah te dahin, union leh state minister bakah governor ahte a ruat chhoh thu Minister chuan a sawi bawk.

Scindia chuan President atana Droupadi Murmu thlan a nih khan Congress chuan an duh lo a, hei hi leilung fate zah lohna lian tak a ni, a ti. Hei bakah Modi chu Prime Minister zingah Bhagwan Birsa Munda pianna hmun tlawh hmasa ber a ni tiin hmasawnna atan scheme thar ruahmante a puang a, mipuite tan budget Rs vbc 34,000 dah a ni tiin Scindia chuan a sawi. Tualchhung mite tan PM Modi chuan Ayushman card, tui connection, zirna leh an mamawh thil dang tam tak a pe bawk a ni, a ti.