Meghalaya leh Tripura larsap thar lalut

Senior BJP hruaitu, V Shanmuganthan chu nimin khan Meghalaya Governor atan rinawma thu tiamtira lakluh a ni.

Meghalaya-in thla li chuang zet Governor nghet a neih loh hnuah May 12 khan Shanmuganthan hi Governor thar atan ruat a ni. Kumin January aṭang khan Governor KK Paul chu Uttarakhand Governor-ah ruat a ni a, hemi hnu hian West Bengal Governor Keshari Nath Tripathi chuan Meghalaya hi a hmui tel nghal.

Shanmuganathan hi Political Science-ah M Phil degree nei a ni a, kum 1962 khan Rashtriya Swayamsevak Sangh (RSS) a zawm a, dinhmun pawimawh tak tak a chelh hnuah Bharatiya Janata Party (BJP) a zawm a, BJP hnuaia Defence, Research & Docu­mentation leh Overseas Friends Cell-ah hruaitu a ni. Tamil mite khawtlang nun leh culture kaihhnawih lam lehkhabu pathum a ziak tawh bawk.

Nimin vek khan West Bengal-a senior BJP hruaitu, Tathagata Roy chu Tripura Governor atan lakluh a ni.

Tripura Governor 16-na tur Roy lakluhna inkhawm hi Agartala Raj Bhavan-a neih a ni a, Tripura High Court Chief Justice Deepak Kumar Gupta-a'n rinawmna thu a tiamtir.

Lakluhna inkhawmah hian Chief Minister Manik Sarkar, a minister leh sorkar official pawimawhte pawh an tel.

Governor thar Tathagata Roy hian state pathum - Tripura, Nagaland leh Assam Governor hna chelh kawptu, Padmanabha Balkrishna Acharya a thlak a ni.

Roy hi kum 1945, September 14-ah Kolkata-ah a piang a, Bengal Engineering College, Sibpur aṭanga civil engineering-ah degree a nei a, kum 1990 khan Design of Metro Railways, Kolkata-ah Chief Engineer hna a thawh laiin voluntary pension-in a chhuak. A chhuah hnu hian Jadavpur University-ah professor hna a thawk leh bawk a, Calcutta University aṭangin law degree a nei bawk.

Kum 2002 aṭanga 2006 thleng khan West Bengal state unit BJP-ah president hna a lo chelh tawh bawk.

Tripura Congress party chuan Governor thar Roy hi an duh loh thu an tarlang tawh a, mahse rorel lai CPI-M chuan an dodal loh thu leh India danpui tlawhchhana a hna ṭha taka thawk tura an phut thu a tarlang thung.

State CPI-M secretary Bijan Dhar chuan India danpui kalh zawnga a che a nih chuan lian zawka nawrh huaihawt khumah Governor thar Roy hi a lo vau tawh bawk.