ATSUM leh AMTU-in memorandum an thehlut

All Tribal Students’ Union Manipur (AT­SUM) leh All Mani­pur Tribal Union (AMTU) chuan Thawhlehni khan Union Minister of Tri­bal Affairs Jual Oram hnenah memorandum theh­lutin, Manipur-a tribal te harsatna hrang hrang an thlen bakah State Commission for Scheduled Tribes din turin an ngen.

ATSUM General Sec­re­tary Vareiyo Shat­sang leh AMTU Gene­ral Secretary Romeo Bung­don chuan thu­chhuah an siamah Union Minister chu Mani­pur tlangram biala chengte hmasawnna tur hnathawh nan kum 25 chhung special economic package ruahmansak tura an ngen thu an tarlang a, Mani­pur tlangram district parukah tribal cultural centres leh research insti­tute hawnsak tura an ngen bakah kumtin Mega Tribal cultural festi­val huaihawt sak tura an ngen thu an tarlang.

Manipur tribal zirlai pawl hnihte chuan tribal quota chu dik lo taka hman a nih thu tarlangin, sorkar hna laknaah tribal te reservation chu a nihna ang taka hman an duh thu an tarlang bawk.

Manipur sorkar chu Tribal Sub Plan (TSP) kalpui ṭha loah an puh bawk a, TSP kalpui nan Tribal Affairs and Hills Department chu nodal agency-a hman an duh thu leh tlangram district tina Autonomous District Council (ADC) te hnenah state sorkar kaltlang loa fund pek an duh thu an thlen.

Tribal zirlaite pawl­te hian tlangram dis­trict parukah sorkar inrel­bawlna ṭha a awm theih nan India danpui Article 371C zulzuiin Hill Areas Committee te thuneihna leh kalphung siamsak an phût thu Union Tribal Affairs Minister hnenah an thlen bawk.