Lungalhthei hralhchhuah theih hun pawtsei

National Green Tribunal (NGT) chuan Meghalaya-a lungalhthei laih­chhuah tawh sa hralhchhuah leh phur­chhuah hun chu June 30 thleng a pawt­sei a, hemi rual hian chhiah (royalty) pek hun erawh May 31 thleng hun a hawng thung.

NGT Chairperson Justice Swatanter Kumar awmna bench chuan, "Fur a tla dawn hnai tawh a, ruah tuiin lungalhthei laihchhuah tawhte a tlak hnan chuan environment pollution a siam dawn a ni, hei vang hian lungalhthei royalty pek hun leh phurchhuah theih chu environment tana ṭha tur anga thutlukna siam a ni," tiin state sorkar hnena hriattirna a pekah a tarlang.

Meghalaya sorkar pawhin dan phal loha lungalhthei laihchhuah a nih tawh loh thu leh phalna nei loa hralhchhuah a nih tawh loh thu NGT a hriattir bawk.

NGT chuan Meghalaya lungalhthei laihchhuah dan, 'rat-hole mining' chu nikum April 17 khan a khap a, state sorkar chu kalphung thar duang chhuak turin a hriattir a ni. Hemi rual hian NGT chuan lungalhthei laihchhuah tawh sate tihral dan turah guideline siamin, a enpui nghal bawk a, lungalhthei neitute chu sorkara chhiah pe hmasa tur leh a hun bithliah chhunga an lungalhtheite hralhchhuak vek turin a lo hriattir tawh bawk.

Mines Development and Regulation Act, 1957 tlawhchhanin, NGT chuan Meghalaya-a lungalhthei laihchhuah tawh sa, tonne maktaduai 6.3 chu hralhchhuah a nih hmain a neitute chu state sorkarah royalty cheng vaibelchhe 400 pe hmasa turin a hriattir a ni.

NGT chuan state sorkar chu lung­alh­thei khura hnathawkte tana 'coal mi­ning plan' siam loah a puh a, hemi chung­changah hian kar ruk chhunga guide­line thehlut turin a hriattir nghal.

NGT hian state sorkarin kalphung thar rintlak zawk a duan hma chu Meghalaya-a lungalhthei laihchhuah hi a la khap reng a, mahse laihchhuah tawh sate chu hun tiam chhunga hralhchhuah a phalsak thung.