Manipur: Mipuiin CM chenna luhchilh an tum

Manipur-a Jiribam khuaa chhungkaw member paruk ruk bote ruang chu luiah chhar an ni. He thil thleng avang hian mipui lungawilo intelkhawm chuan Manipur chief minister N Biren Singh chenna chu Inrinni khan luhchilh an tum.

Mi parukte ruang hi chhar an ni a, an chhungkua hi Thawhṭannia buaina chhuah hnu lawkah an bo tih report a ni.

Ruang hmuh a nih hnua mipui lungawi lo,CM chenna in luhchilh tumte leh security force inkarah buaina a chhuak zui bawk. Security force hian mipui lungawi lo hnawh darh nan tear gas an hman a ngaih phah a ni.

State khawpui, Imphal-a mipui pungkhawm chuan dan siamtute hmuh an phut a, sorkarin an buaina a ngaihthah avanga an lungawi loh thu an sawi. Minister pathum leh MLA paruk chenna inte beih an ni bawk. Buaina chhuak vang hian Imphal Valley-a Imphal East leh West, Bishnupur, Thoubal leh Kakching district-ah total curfew puan a ni zui bawk.

Pungkhawmte hian police station paruk area-a sipai hnena thuneihna sang pekna, Armed Forces (Special Powers) Act (AFSPA) hman a ni chu an sawisel bawk. He dan hman mek hi ngaihtuah nawn a, sut turin an phut.

Manipur tualchhung buaina chhuakah hian mi 250 velin nunna an chan tawh a, mi 60,000 chu an chenna aṭanga insawn chhuakin hmun him lamah an tlanchhe tawh bawk a ni.