Meghalaya: CM-in state chhunga press mite hamṭhatna puang

Meghalaya sorkarin state chhunga press mite tan welfare scheme thar a ruahman chu chief minister Conrad K.Sangma-a'n November 16 khan a puang.

National Press Day lawmnaah CM Sangma chuan thu sawiin, sorkarin journalist boral chhungte hnen zangnadawmna, Rs nuai khat a pek ṭhin chu Rs nuai nga ah an ti pung tih a sawi. Hei bakah hian pianphunga rualban lohna nei, journalist te tana financial assistance Rs 50,000 pek ṭhin pawh Rs nuai 3 a tih pun a nih thu a sawi bawk. CM chuan press mite leh sorkar mi pawimawhten press fraternity chungchang en hona tur committee din a nih thu leh, he committee atan hian Rs nuai 35 an dah thu a sawi bawk.

Sangma chuan he committee hi press leh DIPR ten thawh hona ṭha an neihna tura tih a nih thu sawiin, member-ah hian director leh sorkar mi pawimawh bakah press member pahnih aṭanga pali dah an nih tur thu a sawi a ni.

National Press Day hi 'Changing nature of the Press' tih thupui hmanga hman niin, journalism leh social media-a thupuandarh chungchang te, thudik leh dik lo hriat hran a pawimawh zia te CM chuan a sawilang bawk.