Assam CM-in state sorkar hlawhtlinna a tarlang

Assam Chief Minister Tarun Gogoi chuan kum 2016-a state assembly inthlan chuh a la tum thu sawiin, kum 14 Chief Minister hna a chelh chhunga a kaihhruai sorkar hlawhtlinna hrang hrang a tarlang.

Gogoi chuan a zawna a term li-na atan kum 2016 inthlanah Congress party-in hnehna a chan leh ngei a beisei thu a sawi bawk.

Chanchinthar thehdarhtute zawhna chhangin, "Inthlan ka chuh leh ngei ang, party dang nena inbei turin ka inpeih a ni. Party malin sorkar kan siam ang a, party dang thawhpui kan tum lo," tiin a sawi.

Assam Chief Minister chuan a kaihhruai Congress party-in tluang taka kum 14 ro a rel chhungin hlawhtlinna tam a thlen thu sawiin, an hlawhtlin chhan chu Assam mipuite, loneitute, kut hnathawkte, zirtirtute, journalist te leh sorkar hnathawkte vang a ni, a ti.

Kum 2001-ah thuneihna an chan thu sawiin, he hun hi Assam chanchina hun khirh lai ber a ni, a ti. "Dan leh thupekin awmzia a nei lo a, hmasawnna hna a chawl a, sorkar hnathawkte thla hlawh pek a ni lo bawk a, Guwahati mipuite chu zanah pawn an chhuak ngam lo bawk a ni. Helpawlte chu an zalen em em bawk a, mahse tunah chuan kha dinhmun kha kan pel tawh a, zan lama programme leh function te chu kan khap a ngai ta hial zawk a ni," a ti.

Gogoi chuan tualthi an tlem phah thu sawiin, kum 2001-a mi 1,500 thi aṭangin kum 2014-ah chuan 154-ah a tlahniam tawh a ni, a ti.

Ṭhalai hna nei lote tan hnathawh tur nuai 85 an siam thu sawiin, heng zingah hian sorkar hna nuai li a tel thu a tarlang bawk a, state per capita income pawh kum 2001-02-a cheng 13,059 aṭangin kum 2014-15-ah cheng 49,480-ah a pung a ni, a ti. Hemi hun chhung vek hian Gross State Domestic Product (GSDP) pawh cheng 38,313 aṭangin cheng 38,313-a a pun thu a tarlang bawk.

CM Gogoi chuan chhiah an lakkhawm pawh vaibelchhe 1,270 aṭangin vaibelchhe 8,177-ah a pun thu a sawi bawk a, kum 2001-02-a excise duty vaibelchhe 147 an lak pawh kum 2014-15-ah chuan vaibelchhe 665-ah a pun tawh thu a sawi bawk.

Hetihlai hian hmasawnna tur tam tak an la neih thu sawiin, "Hma sawn zel mah ila state hnufual kan la ni a, hei vang hian Special State status kan mamawh a ni, tiin Gogoi chuan sorkar laipuiin funding pattern a tihdanglam leh Centrally funded schemes ṭhenkhat a tihtawp chuan Assam tan harsatna a siam dawn a ni, a ti.

Gogoi chuan a education policy sawiseltute chu chhangletin, a kaihhruai sorkarin education sector-ah nasa taka hmasawnna a thlen thu a sawi.

"Kum 2001-ah Gauhati University-ah zirlai 1,500 an awm a, mahse tunah chuan zirlai 5,000 awm tawhin, department thar hawn belh mek zel a ni. Dibrugarh University-ah kum 2011-a zirlai 1,459 aṭangin tunah chuan 4,250-ah a pung tawh bawk. Ka sorkar chuan zirtirtute pension leh thla hlawh tihpun nan hma a la bawk a ni. Tunah hian Assam-ah medical seat 1,544 a awm tawh a, kum 2001-ah chuan seat 775 chauh a awm a ni. Engineering seat pawh kum 2001-a 510 aṭangin kum 2014-ah chuan 4,500-ah a pung tawh bawk," tiin a sawi.