Meghalaya: NEHU-in 'internal report' siam tur panel din

Zirlaite nawrh huaihawt vanga harsatna tawk mek, Meghalaya-a North-Eastern Hill University(NEHU) chuan thuchhuah siamin, Ministry of Education hnena internal report thawn tur siam tur panel din a ni tih a puang. Committee hian university chhunga dan kenkawh dan fel tawk lo leh inkaihhruaina ṭha a awm loh avanga buaina an tawh an tarlang dawn a ni.

Union ministry in buaina thleng mek chungchang chhui chiang tura committee din anih thu a sawi hnuah an puang zui ve nghal a ni.

NEHU-in committee a dinah hian NEHU Teachers' Association (NEHUTA), NEHU Students Union (NEHUSU), Khasi Students Union (KSU)- NEHU unit, senior professor te leh stakeholder dang an tel. NEHUTA president Lakhon Kma chu committee chairman atan an ruat bawk.

November 14, 2024 khan Union ministry chuan NEHU zirlai, zirlai pawl leh media lamin university buaina chungchang an sawite chu a ngai thutak hle a, hemi buaipui tur hian committee din a nih thu a lo puang tawh a ni.

University zirlaiten tiam chin awm loa chawngheia nawrh an huaihawtna pawh nimin, November 18 kha a ni 14-na a ni tawh bawk. VC Shukla bang tura an phutna leh Registrar leh official dang an nihna aṭanga ban tura phutin lungawi lohna hi lantir an ni. University pawh November 6 aṭang khan khar a ni tawh bawk a ni.