Hel hluar chhanah Rijiju-a'n Congress a puh

Union Minister of State for Home Affairs Kiren Rijiju chuan hmarchhak biala hel pawlte chu sorkar laka helna bansana nunphung pangngai zawm tura ngenin, hel hluar chhanah Congress party kaihhruai, UPA sorkar chu a mawhphurtuah a puh.

Congress vice president Rahul Gandhi-a'n tunhnaia loneitute a tlawh chungchang chu Rijiju chuan sawichhuakin Rahul chuan thil awmzia a hre thiam lo a ni, a ti a, "Kum 60 chhung Congress sorkar rorelna chhiat zia en turin khualzin angin loneitute a tlawh a ni," a ti.

"Ṭhalaite theihna chu thil dika hman a nih theih nan kawng dik kawhhmuh an ṭul a, tunhnaiah inthlan campaign-in hel hluarna hmun tam tak ka tlawh a ni. Hel pawlte hlaua mipuiin nitin an nun an hmanna hmun, Manipur pawh ka tlawh a, ṭhalai tam tak chu Congress kaihhruai, UPA sorkar rorelna dik lo avangin nunphung pangngai kalsan a, silai chawiin an hel a ni. Heng ṭhalaite hian lakah hian kan sorkar hi fiah ka ngam a, nunphung pangngai zawm a, ram hmasawnna atana tha thawh ve turin turin ka sawm a ni. Anmahni chhawmdawlna chu sorkarin a ngaihtuah dawn a ni," tiin Rijiju chuan a sawi.

Rijiju chuan a chhuahna state, Arunachal Pradesh-a Congress rorelna hmunah an party dinchhuah nan theihtawp chhuaha beih a ṭul thu a sawi a, "Mi ṭhenkhat chuan lotus (BJP symbol) chu tlangramah a vul thei lo niin an ring a, mahse Himachal Pradesh-ah a vul thei a nih chuan eng vangin nge Arunachal-ah a vul theih loh bik ang? Ṭhalaite chakna hmanga party bul ṭhut tihngheha Congress party paihthlak chu ka tan chona a ni," tiin a sawi bawk.