Mumbai leh N'land-in exchange prog kalpui dawn
Nagaland Governor P B Acharya hmalaknain Nagaland leh Mumbai chuan ‘People-to-People Programme for National Integration and Faculty Exchange Programme' an kalpui dawn.
Exchange Programme bul ṭan nan tunhnai khan Mumbai-a zirtirtu 11 leh Gujarat-a zirtirtu pahnih chuan ni 10 chhung Nagaland an tlawh a, zirtirtute hian Nagaland school ṭhenkhata IT infrastructure neih ṭhat lohnaah computer thawn an tum bawk.
Programme hnuaiah hian Nagaland a zirtirtute pawh Mumbai an tlawhna hun siamsak an ni dawn a, Nagaland-a an zirlaite hnena computer lesson an zirtir hmain Mumbai-ah training an nei hmasa ang.
Nagaland tlawhtu Mumbai-a zirtirtute hi Vidyanidhi group of institutes aṭangin pathum an tel a, Gopal Sharma International School aṭangin pali leh school hrang hrang aṭangin pali an tel a, Gujarat aṭangin pahnih an tel bawk. Nagaland an cham chhungin Peren, Jalukie, Dimapur leh Kohima-a school 26 an tlawh bakah zirlai 4,000 chuang an hmu hman a, a hranin zirlai rethei deuhte leh an chhungte an hmu bawk a ni.
Governor Acharya hmalakna hnuaiah Nagaland leh Gujarat chuan cultural exchange programme an kalpui bawk.
‘People-to-People Programme for National Integration and Faculty Exchange Programme' hnuaiah hian tun hnai khan Rotary Club of Mumbai (North) hnuaia doctor rualte chuan Nagaland tlawh tawhin, hmun hrang hrangah health camp an lo buatsaih tawh bawk.