NSCM (IM) lakah sorkar laipui a nêm: Ibobi

Manipur Chief Minister O Ibobi Singh chuan BJP kaihhruai sorkar laipui chu National Socialist Council of Nagaland (IM) helte laka nem lutukah a puh.

June 1-a Manipur-a Auto­nomous District Coun­cil te inthlan neih tur atana inbuatsaihnaah NSCN (IM) mi leh sa ṭhenkhat chuan Congress worker te kut an thlak niin Ibobi chuan a sawi a, sorkar laipuiin NSCN (IM) te chet danah hma a lak loh avangin an chunga nêm lutukah a puh a ni.

Manipur Chief Minister chuan NSCN (IM) leh sorkar laipuiin remna zawnga inbiakna an kalpui mek chungchang sawichhuakin, "NSCN (IM) helte'n inbiakna neih a nih laiin inkahhai thuthlung an bawhchhia a, mahse sorkar laipui chuan inbiakna a neihpui mek, helte chet dan pawh a la hre lo a ni," tiin thilthleng hian remna zawnga inbiakna NDA sorkarin a ngaihpawimawh tawk loh zia a tilang, a ti.

Ibobi chuan Dzuko Valley-a Nagaland nen ram an inchuh chungchang sawiin, a kaihhruai sorkarin inquiry neih thuai a tum thu leh sorkar laipuia thlen an tum thu a sawi. Inquiry report siam a nih hnuah Manipur sorkarin Nagaland sorkar biak a tum thu a sawi bawk.