Ram inchuh vangin bandh huaihawt dawn

Nagaland mite'n Ma­ni­pur ram an luahsak avanga an lungawi lohna lan­tir nan Manipur-a Naga pawl, United Com­mittee Manipur (UCM) leh All Manipur United Club Orga­nisation (AMU­CO) ṭangrualte chuan ni­zan zanali aṭanga ṭanin dar­kar 24 chhung bandh huai­hawt a tum.

Manipur-a Naga pawl, 'Mao Council and Com­mittee for Koziirii and Dzüko Land' leh pawl dangte chuan Naga­land-a, Southern Angami People Orga­nisation (SAPO) chuan hel pawlte hmang­in Manipur ram luah­sak a, chhuhsak an tum tiin a tarlang.

Mao Council chuan hel pawlte hmangin ram­ngaw hausakna nasa taka haichhuakah SAPO chu a puh bawk a, Koziirii leh Dzüko ram chu Mani­pur-a Naga hnam chi khat, Mao mite ram dik tak a ni, a ti.

Information Centre for Hills Area, Manipur (ICHAM) pawh Naga­land sorkar chu Manipur ram luah a nihnaa inhnam­hnawihah a puh bawk.

UCM president Elang­bam Johnson chuan Mani­pur sorkar chu a ram hum­himna atan hma la tura a phut thu sawiin, Naga­land mite chuan ramri aṭangin Manipur ram kilometre 10 chuang an luah tawh tiin a sawi a, ram endik tura kal, sorkar official te chu Nagaland sorkar sipaite an lo awm ṭhin avangin eng mah an ti thei ṭhin lo a ni, a ti.