Arunachal-in cold storage din dawn

Arunachal Pradesh sorkar chuan state chhunga thlai leh thei tharchhuah te vawnṭhatna atan Indian Railways nen ṭangrualin cold storage din a tum.

New Delhi-a NEC plenary meeting neihah Chief Minister Nabam Tuki chuan cold storage facility siam chungchang hi a lo sawichhuak tawh a, hemi bawhzuina atan hian Railway Ministry hnuaia Container Corporation of India Limited hotute chuan tun hnai khan Arunachal Chief Secretary an hmu tawh bawk.

State sorkar thuchhuak chuan Naharlagun, Ruksin (Pasighat) leh Bhalukpong chu rel thlen hmun a nih avangin cold storage dinna atana a remchan tur thu a tarlang a, a bul ṭan nan leh Detailed Project Report (DPR) siam nan Naharlagun rel station bulah cold storage siamna tur chu zirchian a nih tur thu a tarlang bawk.

Cold storage dinna atan hian state sorkarin ram leh Central scheme kaltlangin senso a tum ang a, a enkawl hna erawh Container Corporation of India-in a thawk ang. Hemi atan hian state sorkar leh Container Corporation of India chuan memorandum of understanding (MoU) ziah thuai an tum.