Mon district-ah night-curfew puang

SS Khaplang-a kaihhruai, National Socia­list Council of Nagaland (NSCN-K) helte'n inkahhai thuthlung an tihtawp avang leh pawikhawihna hrang hrang thleng ṭhin avangin Naga­land, Mon district thuneitute chuan zan lamah curfew an puang.

Mon district hi Arunanchal Pradesh, Assam leh Myanmar ramria awm a ni.

Deputy Commissioner (DC) W Honje Konyak chuan Code of Crimi­nal Procedure (CrPC ) section 144 tlawhchhanin, zan lama curfew a puang a, zan dar ruk aṭangin a tuk zing dar nga thleng a awh.

Hetihlai hian DC Konyak chuan curfew laia duty, security force te chu civil mite chunga pawikhawihna thlen lo turin a ngen a, tihpalh thil thua pawisawilote chunga tharum thawhna a thlen loh nan security force te thawm­hnaw rawng, camouflage leh khaki thuamhnaw te chu Mon district-ah hralh khap a ni, a ti.

NSCN(K) te'n inkahhai thuthlung an tihtawp hnuah security force te chuan Nagaland pumah beihpui thlaka an dap nghal thu a sawi bawk.

NSCN (K) hian sorkar laipui nena inkahhai thuthlung an neih chu chhun­zawm duh tawh loin, March 28 khan an titawp.