Meghalaya : NEHU Acting VC-in zirlaite nawrh titawp turin ngen

North-Eastern Hill University (NEHU) zirlaiten nawrh an huaihawt mek chu ti tawp turin Acting Vice-Chancellor Professor Nirmalendu Saha chuan a ngen. Zirlaite hian chaw ngheia nawrh an huaihawt chu nimin, November 19 kha a ni 15-na a ni tawh a ni.

Acting VC chuan zirlaite hnenah chaw ngheia nawrh an huaihawt chu an hriselnain a tawrh phah tih sawiin nawrh titawp turin a ngen a, zirlai nuar mekte hriselna dinhmun enfiah turin medical team pawh a hriattir thu a sawi bawk. Prof Saha chuan zirlaite venhim leh an hmakhua tur ngaihsak chu thuneitute tih tur a nih thu a sawi a, thutlukna siam zawng zawng pawh zirlaite tan a ṭha ber an duh vanga ti an nih thu a tarlang.

Zirlaite hian thil phut hrang hrang neiin chung zingah chuan vice-chancellor Professor Prabha Shankar Shukla ban tir bakah Registrar, Deputy Registrar leh official dang ṭhenkhatte an nihna aṭanga ban tirte a tel.

Acting VC hian NEHU Teacher's Association (NEHUTA) NEHU Students Union (NEHUSU) leh NEHU Non-Teaching Staff Association (NEHUNSA) member te chu inbiakna a neihpui bawk.

NEHU vice-chancellor Professor Prabha Shankar Shukla-a'n ni 14 chhung chawlh a lak hnuin zirtiru zinga senior ber, Professor Nirmalendu Saha hian a ai a awh rih a ni.