Chief Minister Gogoi-a'n scheme thar tlangzarh

Assam Chief Minister Tarun Gogoi chuan kum 2016 state assembly inthlanah an party-in hnehna an chan ngei a beisei thu sawiin, scheme thar a tlangzarh nghal.

Scheme thar te hi insurance policy thar, puan tahtute leh kut hna thawkte hamṭhatna scheme bakah low-cost housing leh police housing scheme te an ni.

Assam-a Congress sorkar kum 14 a tlin lawmnaah Gogoi chuan scheme thar hi a tlangzarh a, Assam Special State status tihtawp leh Centrally-sponsored schemes (CSS) ṭhenkhat tihtawp chungchangah Prime Minister Narendra Modi kaihhruai NDA sorkar chu sawiselin state sorkarin scheme a kalpui mekte erawh chhunzawm zel an tum thu a sawi.

"Eptute chuan thu dik tawk lo hmangin min puh hmingchhiat an tum nasa hle a, hetiang karah hian inthlanah hnehna kan lo chang tawh ṭhin a, tun ṭumah pawh hian kan chak leh ang. Mipuite'n thlawp tur an hria a, an tana hnathawk ṭhin sorkar an hria a ni," a ti.

Gogoi-an scheme thar a puang zinga scheme pakhatah chuan bank account nei, mi nuai 10 zinga cheng singkhat aia tlem neite chu sorkarin cheng 500 ṭheuh an account-ah a dahsak ang.

Puan tahtute leh kut hna thawkte scheme atan cheng vaibelchhe 400 dah a nih tur thu a sawi bawk a, low-cost housing leh police housing scheme atan cheng vaibelchhe 500 dah a nih tur thu a sawi bawk.

Chief Minister Gogoi-a'n insurance scheme thar a puanah hian chhungkaw pakhatin kum khatah cheng 5 dahin, chhungkuaa eng natna leh chhiatna avang pawha thihna a thlenin insurance cheng nuai hnih thleng an la thei ang.

Gogoi chuan kum 14 chhunga a sorkar hlawhtlinna a tarlang bawk a, kum 2001-a sorkarna an chan aṭangin state per capita income, bank deposit leh Gross State Domestic Product (GSDP) a pun bakah agriculture, education leh health sector-ah hmasawnna tam tak a thleng a ni, a ti. Hel pawlte pawikhawihna avanga civilian thi zat pawh kum 2001-a mi 1500 aṭangin kum 2014-ah chuan mi 154-ah a tlakhniam thu a sawi bawk.

National Democratic Front of Bodoland (NDFB-S) leh United Liberation Front of Assam (ULFA-I) helpawlte chu inbiakna dawhkan kilpui turin Gogoi chuan a sawm bawk a, state sorkar chuan India danpui tlawhchhanin inbiakna nei duh, helpawlte chu biak a peih reng a ni, a ti.

Sorkar laipui ṭanpuina eng emaw zat dawng ṭhin mah se Assam chu state hnufual a la ni tih Gogoi chuan a sawi a, hetihlaia sorkar laipui special state status a tihtawpsak chu lungchhiatthlak a tih thu a sawi.

"Union Finance Minister Arun Jaitley chuan Special State status chu 14th Finance Commission rawtna anga tihtawp a ni, a ti a, eng vangin nge sorkar laipui chuan 14th FC rawtna chu a pawm?" tiin Gogoi chuan a sawi a, state sorkarin scheme a kalpui mekte chu chhunzawm zel a tum thu leh scheme thar an tlangzarh zawk thu a sawi.

"Kut dawh kan ni lo a, Assam mipuite hian an zahawmna hum dan an thiam a ni. Sorkar laipui chuan Assam laka a mawhphurhna a tipuitling mai tur a ni," a ti.