HNLC dan pawna hnawlna pawtsei
Unlawful Activities (Prevention) Tribunal chuan Hynniewtrep National Liberation Council (HNLC) dan pawna a hnawlna chu kum nga chhung a pawtsei.
Tribunal chuan hemi chungchangah hian March 7 leh April 18 khan Shillong-ah hearing a lo nei tawh a, April 29-a Delhi-a hearing neih a nih leh hnuah dan pawna hnawlna hi a nemnghet a ni.
Shillong-a hearing neih a nih ṭumin state sorkar leh sorkar laipui chuan HNLC hi dan pawna hnawl an la duh thu tarlangin, hemi atan hian Delhi High Court-a, Unlawful Activities (Prevention) Tribunal Judge AK Pathak hnenah ngenna an lo thlen tawh bawk.
Meghalaya sorkar counsel Ranjan Mukherjee chuan HNLC te hi a hmain Unlawful Activities (Prevention) Tribunal Act tlawhchhanin kum hnih chhung dan pawna hnawl an nih tawh thu a sawi a, dan siamṭhat a nih hnuah tun ṭumah hian kum nga chhung pawhsei a ni, a ti.
Ministry of Home Affairs (MHA) Joint Secretary (North East in-charge) Shambu Singh chuan HNLC kum nga chhung dan pawna hnawlna hi tihchian a nih tawh thu Pathianni khan a sawi bawk.
Kum 2000, November 16 khan HNLC te hi Unlawful Activities (Prevention) Act tlawhchhanin dan pawnah hnawl an lo ni tawh a, a hun tawp hnuah kum hnih chhung pawhsei belh zel a ni.
Hetihlai hian HNLC chuan nikum khan remna zawnga inbiakna neih an duh thu state sorkar an hriattir tawh a, mahse tun hnaia media report chuan HNLC hel te'n tlakhniam lam an pan zel avangin state sorkar leh sorkar laipui chu inbiakna tura an phur loh thu an tarlang.