LBA kalpui thuai dawn

India leh Bangladesh-in ram inchuh thubuai chinfelna atana ruahman, Land Boundary Agree­ment (LBA) kalpuina turin Rajya Sabha leh Lok Sabha chuan May 6 leh 7 khan constitution amendment bill an pass tawh a, hemi kalpuina atan hian sorkar laipui chuan hun bithliah siam lo mah se a taka kalpui thuai a tum thu a sawi.

Ministry of Home Affairs (MHA) official chuan hemi chungchang hi sawiin, LBA chu a taka kalpui a nih hnuah India-in Bangladesh ramri hung hna a la thawh zawh lohte chhunzawm a tum thu a sawi.

India leh Bangladesh-in thu­thlung an ziah angin ram pahnih surveyor te chuan ramri chhinchhiahna an siam tawh thu a sawi a, mahse ramri chhinchhiahna ṭhenkhat chu kum 2011-a LBA ziah nawn a nih hmaa siam a nih avangin ram pahnihte chuan ramri chhinchhiahna chu an la ennawn a ṭul thu a tarlang.

Ramri chhinchhiahna siam fel a nih hnuah ram inthleng tura mihring cheng zat chhiar a nih tur thu official chuan a sawi bawk a, inremna angin Bangladesh ram chhunga India mite chenna ram bung 111, acre 17,160-a zau chu Bangladesh-in a nei hlen ang a, India ram chhunga Bangladesh mite ram acre 7,110-a zau chu India-in a nei hlen thung dawn a ni, a ti. Heng ram inthleng tura mihring awm zat hi kum 2011 khan India leh Bangladesh ṭangrual chuan an lo chhiar tawh a, mi 51,000 vel an cheng a ni. India mi Bangladesh ram luahtu zinga chhungkaw 300 chuan LBA kalpui a nih hunah India rama haw an duh thu an sawi tawh bawk.

Kum li a ral tawh avangin mihring awm zat hi chhiar nawn leh tura ruahman a ni a, ram inluahsakna hmuna chengte hi India emaw Bangladesh rama an cheng hlen duh a nih chuan anmahni duhthlanna anga awmtir an ni ang.