DoNER-in Arunachal-a vbc 900 chingpen chhuitir dawn
Sorkar laipui fund luang ral nasa lutuk venna atan hma lak tumin Development of North Eastern Region (DoNER) Ministry chuan Thawhṭanni khan Arunachal Pradesh-a cheng vaibelchhe 900 chuang tihchingpen chhuichiang turin hriattirna a chhuah.
DoNER Minister Jitendra Singh chuan Centrally Sponsored Schemes, Non-Lapsable Central Pool of Resources (NLCPR) leh North Eastern Council (NEC) kaltlanga Arunachal hnena sorkar laipuiin fund a pekchhuahte chu DONER secretary chhuitir a tum a ni.
State MLA 11 chuan kum 2011-12 aṭanga kum 2014-15 thlenga Arunachal Pradesh-in central fund a hmuhte a nihna tur dik taka hmang lo leh khawih chingpenah Congress kaihhruai, state sorkar an puh a, DoNER Ministry-ah complaint an thehlut a ni.
DoNER Minister Singh chuan DoNER Secretary chu Arunachal Pradesh-a sum chingpen chungchangah hian document pawimawhte lakhawm tur leh project an kalpui dante chhuichiang nghal turin a hriattir a, a ṭul angin state sorkar pawh insawifiah tura hriattir an ni ang.
MLA 11 complaint thehluttute hi- Arunachal assembly-a eptu hruaitu Tamiyo Taga, Deputy Leader of Opposition Japu Deru, BJP Legislature Party Chief Whip Tage Taki, Tumke Bagra, Tamar Murtem, Dr Mohesh Chai, Laisam Simai, Tesam Pongte, Kaling Moyong, Kento Rina leh Olom Panyang te an ni.
MLA te chuan state sorkarin project tam zawk a kalpui mekah fund a tihchingpen avangin project te chu a hun takah peihfel a ni ṭhin lo an ti a, state sorkar chu Non-Plan Head atana central fund pawtpeng ṭhina an puh bakah hei hi state sorkarin ‘Utilisation Certificates’ a thehluh theih loh chhan a ni, a ti.