Modi-a'n hmarchhak bial inkalpawhna bawhzui dawn

Sorkar laipuia official chuan Prime Minister Narendra Modi-a'n thla leha Bangladesh a tlawh hunah Bangladesh kaltlanga hmarchhak bial leh India ram state dangte inkal­pawhna chungchang bawhzui a tum thu leh ngaihpawimawh a tum thu a sawi.

Official chuan hmarchhak bial inkalpawhna tihchangtlun chu Modi-a'n Bangladesh a tlawh huna a ngaihpawimawh ber turte zinga mi a ni tih sawiin, "Hmarchhak bial awmna kil lutuk chu a hma a sawn loh chhan niin Prime Minister chuan a ngai a, hei vang hian kawng engkima hmarchhak hmasawn nan a rang lama inkalpawhna tihchangtlun a ngai a ni," a ti.

Official chuan hmarchhak hmasawn nan Bangladesh nena inlaichinna ṭha leh thawh­hona ṭha siama, an ram kaltlanga hmarchhak kalpawhna kawngpui siam chungchang chu Modi-a'n Bangladesh a tlawh huna an ram hotute a sawipui tur pawimawh berte zinga mi a ni, a ti.

Bangladesh sorkar chuan a thuphungin Chittagong lawng chawlh hmun chu India tan hman a phalsak tawh a, mahse lehkha pawimawh chinfel ngai erawh a la awm thung.

Official chuan Bang­ladesh-in India tan Chitta­gong lawng chawlh hmun a hawnsak a nih chuan hmar­chhak bial chu a chhawr ṭangkai ber tur a ni, a ti a, lui leh tuipui lama inkalpawhna ṭha awm lo chu India ramin Independence a hmuh aṭanga hmarchhak bial harsatna a ni, a ti.

"West Bengal hmarlama 'chicken neck' chauhin India ram state dangte leh hmarchhak bial hi a thlun­zawm a, hei vang hian hmarchhak bialah bungraw thawn luh a harsa ṭhin a, thil man pawh a san phah ṭhin a ni. Chittagong lawng chawlh hmun leh Bangladesh kaltlanga bungraw thawn luh theih a nih chuan heng harsatna hi nasa takin a chhawk zangkhai dawn a ni," tiin a sawi bawk.

Sorkar laipui official chuan Bangladesh nena inlaichinna ṭha siam chu India ram economy-in hlawkpui tur a nei tam lo a, mahse hmarchhak bial hmasawnna atan erawh a ṭangkai a ni, a ti.