Ram inchuh thubuaiah state pahnih sorkar an ngawi
Dzukou valley-a, Manipur leh Nagaland ram inchuh thubuaiah state pahnih sorkar te chuan ngawih an chuh.
Ram inchuh thubuai kaihhnawihah hian Manipur lama tlawmngai pawl ṭhenkhat chuan an lungawi lohna lantirin bandh an lo huaihawt tawh a, Manipur-a Naga pawl, Mao Council chuan Manipur sorkar chu hma la ngam loah puhin, Chief Minister Ibobi Singh hnenah memorandum an thehlut tawh bawk.
Manipur Chief Minister Ibobi chuan Dzukou valley-a Manipur ram chin chu Naga mite'n an luah thu leh Naga pawl, South Angami People’s Organisation-in guest house leh motor kawngpui an sial thu a lo sawi tawh a, mahse Manipur sorkarin hei hi a bawhzui loh avangin Naga mite hian eng chen nge Manipur ram an luah tih chiang taka hriat a ni lo.
Manipur lama tlawmngai pawlte chuan state sorkar hi a la ngawi reng dawn a nih chuan June 1 aṭanga kawngpui danchah an tum thu an tarlang a, mahse Chief Minister Ibobi chuan June 1-a Autonomous District Council inthlanna neih zawh hunah chauh ramri chungchang hi bawhzui a tum thu a sawi.
Dzukou valley-a ram inchuh avang hian Manipur-a Naga hnam, Mao te leh Nagaland lama, Angami mite inkarah inhmuhthiam lohna a thleng mek a, pawl hnihte hi Naga Hoho chuan remna siam thuai turin a ngen.