NE state te Special Status chhunzawm ni rawh se: Tripura CM
Sorkar laipuiin hmarchhak state-te special category status a tihtawpsak chungchangah Tripura Chief Minister Manik Sarkar chuan hmarchhak state Chief Minister te chu an ṭanrual thu sawiin, special category status chu chhunzawm zel a duh thu a sawi.
Sarkar chuan hemi chungchangah hian hmarchhak state Chief Minister ṭangrual te'n resolution an pass thu sawiin, Prime Minister hnenah thlen a nih tawh thu leh Prime Minister Office aṭanga chhanna an la dawn loh thu a sawi.
"India ram state dangte hmasawn ruala state hnufual zawkte an kal theih nan special state status chu chhunzawm zel a ṭul a, state hnufualte chuan sorkarin laipui aṭangin ṭanpuina an mamawh a ni," tiin kum 17 chhung Tripura Chief Minister hna lo chelh tawh Sarkar chuan a sawi.
Hmarchhak Chief Minister te'n special state status chungchanga ṭangruala resolution an siam hi Sarkar buatsaih a ni a, Tarun Gogoi (Assam), Lal Thanhawla (Mizoram), Mukul Sangma (Meghalaya), T.R. Zeliang (Nagaland), Nabam Tuki (Arunachal Pradesh), Okram Ibobi Singh (Manipur) leh Pawan Kumar Chamling (Sikkim) te'n hming an ziah hnan.