China-in India ramri-ah McMohan Line pawm lo

China chuan India nena an inri-na, McMahon Line chu ramri-ah a pawm loh thu tarlangin India nena ram inchuh thubuai an neih chu inbiakna leh inṭhianthatna hmanga chinfel theih a rin thu a sawi.

Chinese Foreign Ministry thupuangtu, Hua Chunying chuan he thu hi sawiin, China chu India nena a inri-naah a chian thu a sawi bakah Arunachal Pradesh chu ‘Southern Tibet' tiin China ram a nih tih a sawi nawn leh bawk.

National Security Advisor (NSA) Ajit Doval-a'n tun hnaia New Delhi-a lecture a pek ṭuma India-China ramri chungchang a sawi chu Chunying chuan chhangletin, "China sorkar chuan McMahon Line hi a pawm lo a ni," a ti.

"Ram inchuh thubuai chinfel nan China chuan eng lai pawhin India nen inbiak a peih reng a ni," tiin a sawi bawk.

May 22 khan NSA Doval chuan India-China ram inchuh thubuai chu ram pahnihte inlaichinna leh thawhhona kawnga harsatna a ni, tiin a chinfel nan ruahmanna felfai tak siam a ngai a ni, a ti a, McMohan Line chu Burma (Myanmar) thleng China-in a pawm thu leh chu mi bak chu a pawm loh thu a sawi bawk.