Meghalaya : NEHU zirlaiten chaw ngheia nawrh ti tawp

Meghalaya High Court chuan North-Eastern Hill University (NEHU) a inkaihhruai dan felhlel awm avanga chaw ngheia nuar mek, zirlaite chu an nawrh ti tawp tura a ngen hnuah, Nilaini aṭang khan zirlaite chuan nawrh an ti tawp.

Chief justice IP Mukherji leh justice B Bhattacharje awmna bench chuan nawrh huaihawt mek chungchanga PIL thehluh an ngahtuah hnuah thupek hi ti chhuakin, state thuneitute chu zirlaite hnena chaw ngheia nawrh chu an hriselna atan a hlauhawm thu hrilh hre turin a chah. Sorkar laipuiin university buaina neih mek chhui tura member pahnih awmna investigative committee din a tum chu zirlaite pawhin nawrh tih tawp nana an hman a ṭul tih an sawi.

High Court-in ngenna a siam hnu leh, damdawi lam thiamten thurawn an pek hnuah, North-Eastern Hill University Students' Union (NEHUSU) chuan tiam chin awm loa chaw ngheia nawrh an huaihawt chu Nilaini aṭang khan a ti tawp tih an puang ve bawk.

Nawrh an huaihawt chhung hian zirlai pathum chu damdawi-inah dah an ni a, an zingah hian NEHUSU president Sandy Sohtun pawh a tel. November 6, 2024 aṭang khan Vice Chancellor Prof Prabha Shankar Shukla leh university top official dangte ban tura phutin zirlaite hian nawrh an huaihawt a, university pawh khar a ni.

Zirlaite hian chaw ngheia nawrh hi ti tawp mah se an thil phut nawr chhunzawmin, nitin zing dar 9 aṭanga tlai dar 5 thleng sit-in demonstration an nei zui dawn.

Ministry of Education chuan inquiry committee dinin, ni 2-3 chhunga report thehlut tura beisei an ni. Sohtun chuan ministry hian an thil phut bul ber , a bik takin university-a nihna pawimawh neite bantir chu a ti hlawhtling lo a nih chuan nawrh chhunzawm zel an tum thu a sawi.