Nagaland: Hornbill Festival 2024 atan Peru thawhpui dawn

Nagaland chuan Hornbill Festival vawi 25-na lo awm turah international cultural diplomacy pholan tumin an inbuatsaih mek a, thawhpui turin Peru nen pawh an inbe fel ta. Peru hi ram a thawhpui tur pathumna niin, a hmain Wales leh Japan pawh inremna an lo siampui tawh bawk.

Chief minister Neiphiu Rio leh Peru ambassador H'E. Javier Manuel Paulinich Velarde ten New Delhi-a meeting an neihnaah thawhdunna tur hi an tifel a ni. Hornbill festival-ah hian Peru aṭangin artist leh performer ten an thiamthil an entir dawn a ni.

CM Rio chuan festival-a Peru arist-te an tel thei tur chu lawmawm a tih thu sawiin, hei hian ram pahnihte inkara inpawhna ṭha leh thawhdunna thuk zawk siamin, mipuite inpawh tawnna pawh a siam ngei a beisei thu a sawi. An thawhdun theihna tura hma la tu Peru ambassador chungah pawh a lawm thu a sawi bawk.