Assam: Dec 10-ah martar-te hriatrengna hmun hawn beisei

Assam sorkarin Guwahati-a Paschim Boragaon area-a Assam Movement 1979-1985-a martar 855-te hriatrengna hmun a siam, Swahid Smarak Kshetra chu December 10, 2024-ah hawn beisei a ni. Hemi huna an peih hman loh pawhin nakkum kumtir lamah hawn theih theih an beisei.

Chief minister Himanta Biswa Sarma chuan Nilaini khan Swahid Smarak Kshetra sak hna thawh mek hi a tlawh a, hnathawhte a hmunah a enfiah a ni. He hmun siamna atan hian Rs vbc 100 ruahman a ni. Hna hi 90% zawh tawh niin, hna thawh tur hmabak hi light leh sound facility leh auditorium te an la awm.

Assam Movement hi All Assam Students Union te hmalakna niin Assam rama dan loa pem lut an duh loh lantirna a ni. He movement hi Assam Accord, 1985 a ziah a nih khan an ti tawp ta a ni.

CM chuan complex-ah hian meditation hall a awm tur thu sawiin, hetah hian Assam Movement hunlaia thlalak pawimawhte chu tlawhtute tana hmuhnawm tur pho lan a ni dawn a ni, a ti. Zawhfel a nih hunah chuan a hmun tlawh dan pawh ticket system hman tura ruahman a ni a, December 10 (Swahid Diwas) bikah chuan a thlawna tlawh theih a ni ang. Hei bakah martar awmna chhungkua te chu ticket ngai loa an luh theih tur thu CM chuan a sawi bawk.