Assam : Karimganj district hming Sribhumi tiin thlak

Assam sorkar chuan Barak Valley-a Karimganj district hming chu Sribhumi tiin a thlak a, district headquarters Karimganj town pawh Sribhumi town tia thlak nghal a ni bawk.

General Administration Department Principal Secretary Mukesh Chandra Sahu chuan Ningani, November 21, 2024 khan thuchhuah siamin, Karimganj district hming thlak a nih thu hi a sawi a, a hming thar hi hman nghal a nih thu a sawi.

Assam cabinet chuan Thawhlehnia meeting an neihah district hming thlak hi an rel a ni. An thutlukna siam chungchang hi meeting zawhah chief minsiter Himanta Biswa Sarma chuan sawifiahin, "Kum 100 chuang liam taah khan Kabiguru Rabindranath Tagore chuan tuna Karimganj district kan tih hi Sribhumi - Maa Laswkmi ram, tiin a lo sawi tawh a ni," tiin district mipuite hun rei tak an lo beisei tawh chu an ti hlawhtling ta tih a tarlang.

CM Sarma chuan an state chhung khua leh district hming dang pawh, an state chanchin nena inzawmna nei lo leh sawifiahna tur awm lote chu an la thlak zel dawn tih a sawi.

Karimganj, Sribhumi district ni ta hi Assam chhim lama awm niin Tripura leh Bangladesh a ri a, Barrak Valley biala district pathum zinga pakhat a ni.