Manipur : CM thlak a nih chuan NPP in thutlukna ennawn dawn

Tun hnaia Manipur-a BJP kaihhruai ṭangrual sorkar thlawpna hnukdawktu, National People's Party (NPP) chuan chief minister N Biren Singh thlak a nih chuan an thutlukna siam tawh chu an ennawn leh theih tur thu an sawi.

NPP national vice-president Yumnam Joykumar Singh chuan sorkar thlawpna an hnuhdawh tawh hnua CM Biren Singh-a meeting kohah, an party MLA pasarih zinga pathum an tel chu ṭha a tih loh thu a sawi bawk.

Manipur-a BJP kaihhruai ṭangrual sorkar aṭang hian NPP hi inhnukdawk mah se BJP hian member 60 awmna, Manipur assembly-ah MLA 32 neiin majority a la nei pha tho a, Naga People's Front (NPF) leh Janata Dal United in an thlawp bawk a ni.

Conrad Sangma kaihhruai NPP hian CM Singh kaihhruai Manipur sorkar chuan an state buaina chinfelna kawnga hlawhchhamah puhin an thlawpna hi an hnukdawk a ni. Sangma chuan Manipur buainaah pawisawi lo mi tam takin nunna an chan tawh a mi tam tak dinhmun hrehawm takah an awm mek bawk a, hetih lai hian Singh kaihhruai sorkar an buaina chingfel thei lo leh mipuite tawrhna ti tawp thei loha a puh. Hei vang hian a kaihhruai sorkar chu an thlawp chhunzawm thei tawh lo niin a sawi.

MLA-te in beihnaa inhnamhnawih mi 7 man

Manipur police-te chuan elected member, MLA te in beihnaa inhnamhnawihah mi pasarih an man tawh tih nimin khan an sawi. Pawikhawihtu dang pawh chhui mek an la ni tih an tarlang bawk.

November 16, 2024 khan state minister pathum leh MLA paruk te chenna in chu mipui thinrimin an bei a ni. He pawikhawihna thleng kaihhnawihah hian a hmain mi 25 man an lo ni tawh bawk a ni.

Mipui lungawi lo ten MLA-te chenna an beih hnuah, Janata Dal (United) MLA KH Joykishan Singh-a nu chuan police-ah complaint theh lutin, Thangmeiband area-a fapa chenna in beitute hian pawisa fai leh thil hlu dang, Rs vbc 1.68 hu an ru chhuak niin a sawi. Hei bakah hian tualchhung buaina chhuak vanga tlanchhiate ṭanpuina pek tur thil hrang hrang pawh tih chhiat a ni tih a sawi bawk. MLA inah hian relief camp-a khawsa mekte hnena sem tur alu leh purusen bakah, thawmhnaw lum lam eng emaw zat dah a ni. Hengte hi in beitute hian an tih chhiat bakah relief camp-a awmte document an dahte pawh an ti chhe tel bawk. A chenna in beih a nih lai hian MLA Singh hi dam lohna vangin Delhi-ah a awm a ni.