Village Administration Bill : KHADC Congress leh State Congress thu inhmu lo

Meghalaya, Khasi Hills Autonomous District Council (KHADC) a rorel lai Congress chuan nikuma Village Admi­nistration Bill 2014-a pass tawh chungchangah state assembly-a rorel lai Congress chu a ṭan hmun tichiang ngam loah a puh.

Kumin May 15-a KHADC Chief Executive Member atana thlan thar, Pynshngaiñ N Syiem chuan Village Administration Bill 2014 hi a tlang theih nan New Delhi-a Congress party High Command te chu state sorkar nawrsak turin a ngen mek a ni.

Syiem hi Shillong MP Vin­cent H Pala-a'n New Delhi-ah a ṭawiawm a, AICC secretary, Northeast in-charge V Narayana­samy hnenah state sorkarin Village Administration Bill 2014 chu Governor hnena a thlen loh thu an hrilh. CEM Syiem hian hemi chungchangah hian AICC president Sonia Gandhi hnenah inrawlh tura ngen­na, memoramdum thehluh a tum bawk.

KHADC CEM chuan, "Khasi mite hnam kalphunga khawtlang leh khaw hotute thuneihna chu Meghalaya High Court-in India danpui palzutna a ni, tiin nikum December khan a hlihsak a, khawtlang hotute thuneihna hi India danpui, Sixth Schedule chuan a pawmpui a ni," a ti. Meghalaya High Court-in khawtlang hruaitute thuneihna a hlihsak tuma hma a lak avangin KHADC chuan nikum June thla khan dan hnuaia khawtlang hruaitute thuneihna hum nan Village Administration Bill a pass a, mahse state sorkar chuan a la bawhzui sak loin, Governor hnenah a la thleng thei lo a ni.

State sorkarin Village Admi­nistration Bill Governor hnena a thlen rih loh vanga lungawi lohna lantirin nimin khan Hynniewtrep National Liberation Council (HNLC) chuan Khasi leh Jaintia hills huam chhungah bandh a huaihawt a, zan lamah kar khat chhung kawngpui danchah a tum bawk.

Khasi khawtlang inrelbawlnaa hruaitute thuneihna Meghalaya HC-in a hlihsak chungchangah hian KHADC CEM Syiem-a'n a thlak tâk, CEM hlui Adelbert Nongrum chuan court zahlohna thubuai a lo awrh tawh bawk a, hemi chungchangah hian May 18 khan man a ni a, May 19 khan court-ah ngaihdam a dil hnuah bail-a chhuahtir a ni.

CEM hlui Nongrum hian May 18 man a nih hma, May 16 aṭang khan Meghalaya sorkarin Village Administration Bill, 2014 a tihkhawtlai avanga lungawi lohna lantir nan leh state sorkar nawr nan chaw ngeia nawrh a lo huaihawt tawh bawk.