HNLC-in bandh huaihawt

Hynniewtrep Na­tio­nal Liberation Council (HNLC) chuan Meghalaya sorkarin Village Administration Bill pawmpui loa a la tihkhawtlai avanga an lungawi lohna lantir nan nimin khan Shillong-ah bandh an huaihawt a, nimin aṭanga khan Khasi leh Jaintia Hills-ah zan lamah kawngpui an dangchat bawk.

Kawngpui danchah hi kar khat chhung neih an tum a, zan dar riat aṭanga ṭanin, a tuk zing dar ruk thleng a awh ang.

HNLC chuan a hmain darkar 48 awh bandh huaihawt turin ruahmanna a siam a, mahse school admission buaipui hun a nih avang leh zirlaite ngenna avangin darkar 24-ah an thlak leh a ni. Bandh hi Thawhlehni zan dar ruk aṭanga ṭan a ni a, nimin tlai dar ruk thleng a awh.

HNLC bandh huai­hawt chungchangah state sorkar chuan thuchhuah siamin, mipuite chu bandh zawm lo tur leh pangngai taka an hna thawh chhunzawm vek turin a hriattir a, sorkar office te pawh hawng vek turin hriattirna a pe.

HNLC publicity se­cretary Sainkupar Nong­traw chuan thu­chhuah a siamah, mipuite chu bandh zawm vek tura ngenin, an zawm lo a nih chuan an chungah eng pawh thleng se mawh an phur loh tur thu a tarlang thung.

Hetihlai hian Un­lawful Activities (Pre­vention) Tribunal chuan tun hnai khan HNLC te dan pawna hnawlna hi kum nga chhung a pawhseisak leh.

HNLC te hi Unlawful Activities (Prevention) Act tlawhchhanin kum 2000, November 16 khan dan pawnah hnawl an lo ni tawh a, a hun tawp hnuah kum hnih chhung pawhsei belh zel a ni.