Thla 5 chhungin NDFB(S) hel 343 man tawh: Assam DGP

Assam Director General of Police (DGP) Khagen Sarma chuan security force te'n thla nga chhungin Songbijit-a kaihhruai, National Democratic Front of Bodoland (NDFB-S) hel 343 an man tawh thu leh hemi hun vek hian mi 10 an kahhlum tawh thu a sawi.

NDFB(S) helte lakah hian police, paramilitary force leh Army te chuan ṭangrualin beihpui an thlak thu Sarma chuan a sawi a, helte hnen aṭangin vawmpuah bomb 164 leh puak thei thil kilogram (kg) 625 an man tawh thu a sawi bawk.

Assam DGP chuan helte laka beihpui thlak turin Central paramilitary force company 50 dahbelh a nih thu leh beihpui thlak chhunzawm zel a nih tur thu a sawi.

NDFB (S) te hian nikum December 23 leh a hnu lama Bodoland Territorial Area District (BTAD) huam chhung leh Sonitpur district-a mi 70 chuang an thah hnuah an lakah hian beihpui thlak nghal a ni.

Manas Reserve forest huam chhungah NDFB (S) hel 30 aṭanga 35 vel an la awm thu Sharma chuan a sawi a, tun hnaia security force te'n an luhchhuah tak, Ultapani camp chu helte ral relna hmun a ni tih a sawi bawk.

"Ultapani camp-ah hian NDFB (S) hel hruaitu Bidai leh hruaitu dangte pawh an awm thu a sawi a, mahse an tlanchhe hman a ni," tiin Sarma chuan a sawi bawk.