BJP MLA te puhna AP sorkarin a chhanglet

Arunachal Pradesh-a eptu, BJP MLA te'n Centrally sponsored fund vaibelchhe 900 chuang khawih chingpena an puhna chu state sorkarin a chhanglet.

BJP MLA te'n state sorkar an puhna hi chhuichhiang turin DoNER Minister Jitendra Singh chuan Thawhṭanni khan DoNER Secretary a hriattir a ni.

Arunachal sorkar thupuangtu Bamang Felix chuan Centrally sponsored fund hman dan chhuichian turah state sorkar a inpeih thu sawiin, hei hi langtlang sorkar siamna atana thil remchang a ni, a ti. Hemi rual hian BJP MLA te'n finfiahna nei loa state sorkar an puhna chu state-in hmasawnna atana a mamawh, Central fund dan chahsak tumna a ni, a ti.

Felix chuan hmasawnna project hrang hrang kalpui mekte leh centrally sponsored scheme kalpui dante chu state sorkarin ngun takin a enpui reng ṭhin a ti a, mahse sum chingpen chhuizui ngai a awm a nih chuan state sorkar chuan a chhuichiang tur, special investigation team (SIT) din a hreh loh thu leh pawikhawihtu chu hrem a hreh loh thu a sawi.

Arunachal-a eptu MLA 11 chuan kum 2011-12 aṭanga kum 2014-15 thlenga Arunachal Pradesh-in Centrally Sponsored Schemes, Non-Lapsable Central Pool of Resources (NLCPR) leh North Eastern Council (NEC) kaltlanga fund a hmuhte dik lo taka pawtpeng leh khawih chingpenah rorel lai, Congress sorkar an puh a, hemi chungchangah hian DoNER Ministry-ah an zual ko a ni.