Nagaland-ah Virtual Hornbill Festival ṭan

Nagaland-a kumtina hman ṭhin, ni 10 awh tur Hornbill Festival chu nimin aṭang khan neih ṭan a ni. Kuminah hian hripui leng vangin kum dang angin festival lawmna hi buatsaih theih a ni lo a, virtual-a neih a ni a, TV channel pathumin an tichhhuak a ni.

Horbill Festival hi Kohima bula Naga heritage village, Kisama-ah neih a ni ṭhin a, statehood day, December 1 aṭanga neih ṭan ni ṭhinin, ni 10 a awh ṭhin. Chief minister Neiphiu Rio chuan festival pualin state mipuite duhsakna a hlan a, Hornbill Festival chu Nagaland sorkar flagship tourism event a nih thu sawiin, khawvel huap pawhin hriat a hlawh tawh a ni, a ti. 

CM chuan, "Ni 10 awh festival kan neih ṭhin hi dangdai tak, festival dang ang a ni ve lo. Naga tribal te nunphung, culture hausa tak leh Naga ṭhalaite theihna hrang hrang neihte pholanna a ni," tiin a sawi.

Hornbill Festival hian hriat a hlawhin festival chhimtu pawh India ram chhung mai ni lo, ram dang aṭangin pawhin mi eng emaw zat an awm ṭhin. Tourism department chuan 2019 Hornbill Festival-ah khan chhimtu  2,82,811 an awm tih sawiin, an zinga mi 3,015 chu ram pawn lam niin, India ram state dang aṭang chhimtu hi 55,584 an awm bawk. 

Nikuma festival lawmnaah hian Indian Air Force (IAF) pawh telin,  Sukhoi 30MKI fighter plane chu festival hmanna chungah an rawn thlawh kual tir a ni.