Manipur : Mobile Internet ni 2 chhung ti tawp chhunzawm

Manipur sorkar chuan Inrinni, November 23,2023 khan mobile internet service chu district pasarih-ah tih tawp chhung a pawtsei leh.

Tualchhung buaina leh inbeihna thleng vangin thuneitu lam chuan service hi November 16 khan ni hnih chhung atan an lo ti tawp tawh a, hemi hnu hian boruak a la ziaawm mai loh avangin an pawtsei chhunzawm zel a ni.

State sorkarin dan leh thupek dinhmun a ennawn hnuah, internet service hi Imphal West, Imphal East, Kakching, Bishnupur, Thoubal, Churachandpur leh Kangpokpi ah te ni hnih chhung tihtawp hun hi an pawhsei belh a ni tiin Home Department chuan thuchhuah an siam.

Manipur sorkar chuan broadband service chu November 19 khan mipui nawlpui, health-care facility leh zirna in bakah office hrang hrang ah buaina leh harsatna a thlen avangin an ti tawp bawk a ni.

Legislator chenna in haltu zinga 7 man belh

Manipur police chuan November 16-a Imphal Valley-a legislator te chenna in haltu zinga mi pasarih an man belh thu Pathianni khan an sawi.

Kakching district police chuan Zirtawpni khan mi pathum man annih tawh thu sawiin, Imphal West district ah Inrinni kha mi pali an man leh bawk. Legislator te chenna in haltu zinga inhnamhnawih an man tawh zat chu 41 an nih thu an tarlang bawk a ni.

Manipur chief minister N Biren Singh chuan Zirtawpni khan minister leh MLA te chenna in suasamtute chu man an nih tawh thu leh, dan hmanga hrem an nih tur thu a sawi bawk.

Pawikhawihtute hian minister leh MLA te chenna hi an hal bakah bungrua te pawh an thiar chhuak a, CCTV hmangin a titu te hi an manchhuakin hrem an nih ngei tur thu thuneitute chuan a puang. CM Singh chuan hetiang thil Manipur-a a thleng hi a zahthlak hle a ni tih chanchinthar lakhawmtute hnenah a sawi a ni.