Tripura : CM-in December 3 ah tourism promo fest hawng dawn

Tripura chief minister Manik Saha chuan a vawikhatna atana tourism-in state chhunga promotion festival a buatsaih tur, Tripura Tourism Promo Fest 2024 chu December 3 hian Gomati district-ah a hawng dawn.

Festival hi hmun lar tak tak pali ah December 14 thleng neih a ni dawn a, state chhunga tourist hip nana buatsaih niin, 39-50 % velin khualzin an pun phah an beisei. Tourism Department director Prashanta Badal Negi chuan programme chu Tripura-a tourism sector hrang hrangah neih a nih tur thu leh state pawn aṭangin tourist operator-te pawh an tel tur thu a sawi.

Festival ah hian tualchhung band ten musical concert an nei dawn a, hnam incheina pholanna hun te, state chhunga hnam hrang hrang ei leh in pholanna food festival pawh a tel dawn a ni.

Neermahal Water Palace, Sepahijala-ah December 9 hian event hrang hrang huaihawt a ni dawn bawk a, North Tripura district-a Jampui Hill ah December 11 hian programme neih a nih tur thu a sawi bawk. A programme pui ber erawh chu Vivekananda Ground, Agartala ah December 12-14 hian hman a ni ang.

He programme a an thil tum ber chu state tourism chawikan bakah,khawvel hmuha an culture leh heritage hausakna pholanna tura tih a ni.

Playback singer lar tak, Shreya Ghosal chu December 15-a closing ceremony Vivekananda Ground, Agartala-a neih tura a inlan ang.