Manipur-in sero-surveillance study nei
Manipur health department chuan an state-a district pali - Churachandpur, Imphal West, Kakching leh Ukhrul-ah Covid-19 leng mek dinhmun zirchiangin sero-surveillance study a nei ṭan.
He zirchianna hi December 19 thleng neih a ni dawn a, hemi chhung hian zirchian turin sample 4,600 an la nghal ang.
Manipur-ah hian hri kai hmuh chhuah tawh hi 25,045 an tling tawh a ni. Thawhṭanni khan hri kai hmuh chhuah thar mi 135 an awm a, hemi ni vek hian enkawl dam mi 165 an awm bawk. Hri kai mek hi 3,198 la awmin, state recovery rate hi 86.1% a ni a, hripui thihpui hi mi 281 an awm tawh bawk.
CM Singh a dam tawh
Chief minister N Biren Singh chu kar hnih chhung Covid-19 a kai avanga a inenkawl hnuah Thawhṭanni khan a sample test lehin a negative tawh tih official-te chuan an sawi.
CM Singh hian hri a kai tih hriat a nih hnu hian Imphal-a a chenna inah inkhung hrangin a inenkawl a ni. Thawhṭanni khan JNIMS hospital-ah a swab sample test niin, hri lakah a fihlim tawh tih hriat a ni. A dam thu hi Singh chuan a twitter-ah puangin, amah duhsaktu leh a tana ṭawngtaitute chungah lawmthu a sawi. Chief Minister chuan hri len leh a la hlauhawmna chu a la bo lo a, hei vang hian mipuite chu fimkhur zual zel turin a chah nghal a ni.