Mipain a sakhua, hna leh sum lakluh a hriattir tur a ni : Sarma

Assam health minister Himanta Biswa Sarma chuan mipate chuan nupui an neih hmain an kawppui tur hnenah chuan a sakhua, hna thawh leh a sum lakluh zat chu a hriattir tur a ni tiin, hemi atan hian sorkar chuan dan  siam tumin a duang mek tih a sawi. 

BJP minister chuan he bill hi innei turte tana thil pawimawh a nih rualin,  hmeichhiate thuam chakna tur pawimawh tak a ni tel dawn bawk, a ti. Chanchinthar lakhawmtute a kawmnaah Sarma chuan, "Nupui pasal inkarah thil thup leh zep a awm dawn chuan inneih loh mai tur a ni. Eng sakhua nge ka zui a, ka eizawnna atan eng nge ka thawh a, ka sum lakluh chu eng zat nge a ni tih hriattir chu thil pawimawh a ni," tiin a sawi. Hemi chungchanga state sorkarin bill siam a tum chu Muslim mipaten an sakhua zawm tir duh vanga sakhaw dang betu hmeichhiate an ngaizawng der ṭhin nia sawi, 'love jihad' chungchang bik vang ni loin, sakhaw tin zuitute tana thil pawimawh a ni tih a sawi. Inneihnaah chuan langtlang takin thil kalpui a ni tur a ni a, nupa chuan thil zep an nei tur a ni lo tiin a sawi. 

Sarma chuan nimin khan  Assam sorkarin hmeichhiate leh rualbanlote chhawmdawlna atana a siam, Orunodoi scheme a tlangzarh bawk. He scheme hnuaiah hian thla tin mi nuai 18.20 hnenah Rs 830 ṭheuh pek a ni dawn tih a sawi . Orunodoi scheme hi state chhunga district 33 zinga 29-ah  tlangzarh a ni a,  chhawmdawlna pek tur hi chhungkuaa hmeichhe hotu ber account-ah dahsak ṭhin a ni ang.

Chhawmdawlna an dawn hi damdawi, chini, thlai leh thei lam chite leina atana tih a ni. He scheme hnuaia hamṭhatna dawng thei tur chuan Assam-a cheng nghet chhungkua, kum khatah cheng nuai hnih aia tlem lalut chinte an nih thu minister chuan a sawi bawk.